Eglwys Dewi Sant, Blaenau Ffestiniog

Mae ein Heglwys yn fan bywiog a gweithgar i addoli Duw ac i rannu yng nghariad a thangnefedd Duw. Mae’r Eglwys yn deulu byw a chyda chymorth Duw mae’n tyfu o flwyddyn i flwyddyn.

Cynhelir gwasanaethau bob Sul fel y nodir uchod, sef un ai’r Cymun Bendigaid neu Foreol Weddi. Croesewir pawb, yn blant ac oedolion fel ei gilydd. Mae gweithgareddau ar gael i blant bob dydd Sul ac rydym am sicrhau eu bod yn teimlo’n rhan werthfawr o’r gynulleidfa.

Mae gan Eglwys Dewi Sant Fanc Bwyd, a leolir yn Neuadd yr Eglwys. Mae pobl Bro Moelwyn yn hael iawn â’u rhoddion o arian a nwyddau. Mae’r Banc Bwyd yn cynorthwyo llawer o bobl yn ardal Blaenau Ffestiniog.